«Қазақстан Республикасы Қаржы министрінің кейбір бұйрықтарына өзгерістер енгізу туралы» Қазақстан Республикасы Премьер-Министрінің орынбасары – Қаржы министрі бұйрығы №199 2023 жылғы 22 ақпандағы (бұдан әрі – Бұйрық) «Салық және бюджетке төленетін басқа да міндетті төлемдер туралы» Қазақстан Республикасының Салық кодексіне (Салық кодексі) және «Салық және бюджетке төленетін басқа да міндетті төлемдер туралы» Қазақстан Республикасының Салық кодексін (Салық кодексі) қолданысқа енгізу туралы» Қазақстан Республикасының Заңына (бұдан әрі – Заң) өзгерістер мен толықтырулар енгізу туралы» 2022 жылғы 21 желтоқсандағы № 165-VII ҚРЗ Қазақстан Республикасының Заңын іске асыру шеңберінде әзірленді.
Заңның 1-бабы 1-тармағының 24) тармақшасымен Салық кодексінің 97-бабының 8-тармағына өзгеріс енгізілді, оған сәйкес салықтардың, бюджетке төленетін төлемдердің барлық немесе жекелеген түрлері бойынша бюджетпен есеп айырысулардың жай-күйі туралы салық төлеушінің жеке шотынан үзінді көшірме алуға салықтық өтініш алынып тасталды және салықтық өтініш орнына салық төлеуші үзінді көшірме алуға сұрау жолдайды.
Осыған байланысты, Бұйрықпен «Салық өтініштерінің нысандарын бекіту туралы» Қазақстан Республикасы Қаржы министрінің 2018 жылғы 12 ақпандағы № 160 бұйрығынан бюджетпен, сондай-ақ әлеуметтік төлемдер бойынша есеп айырысулардың жай-күйі туралы жеке шоттан үзінді көшірме алуға арналған салық өтінішінің нысаны алынып тасталды.
Бұйрықпен «Бюджетпен есеп айырысулардың жай–күйі туралы, сондай-ақ әлеуметтік төлемдер бойынша жеке шоттан үзінді көшірмелер беру» мемлекеттік қызметін ұсыну кезінде салық төлеушінің салықтық өтінішті сұрау салуға алмастыру бөлігінде Қазақстан Республикасы Қаржы министрінің 2018 жылғы 27 ақпандағы № 306 бұйрығымен бекітілген Жеке шоттарын жүргізу қағидаларына (бұдан әрі – Қағидалар) өзгерістер енгізілді.
Бұдан басқа, Қағидаларға «Мемлекеттік көрсетілетін қызметтер туралы» Қазақстан Республикасы Заңының 14-бабына енгізілген өзгерістерге байланысты өзгертулер енгізілді, оған сәйкес мемлекеттік қызмет көрсету тәртібін айқындайтын заңға тәуелді нормативтік құқықтық акт оған енгізілген өзгерістер мен толықтырулар туралы ақпаратты өтініштерді қабылдауды және Мемлекеттік қызмет көрсету нәтижелерін беруді жүзеге асыратын ұйымдарға және көрсетілетін қызметті берушілерге жіберу тәртібін көздейді. Сондай-ақ, «мемлекеттік қызмет стандарты» деген сөздер «мемлекеттік қызмет көрсетуге қойылатын негізгі талаптардың тізбесіне» ауыстырылды.
Сонымен қатар, «Азаматтарға арналған үкімет» Мемлекеттік корпорациясы қызметінің Қағидаларына сәйкестікке келтіру мақсатында Қағидаларға «Азаматтарға арналған үкімет» Мемлекеттік корпорациясы» коммерциялық емес акционерлік қоғамының жұмыс кестесіне қатысты өзгерістер енгізілді.